Forsíða

Árshátíð Víkurskóla var haldin að viðstöddu fjölmenni fimmtudaginn 21. mars í Félagsheimilinu Leikskálum.  Nemendur 1. bekkjar fluttu söngatriði og nemendur 2.-6. bekkjar fluttu leikverkið Glöggt er gests augað sem samið var af Kolbrúnu Hjörleifsdóttur.  Krakkarnir stóðu sig allir með miklum ágætum og voru sér og sínum til sóma.

Leikkonan Jóhanna Friðrika Sæmundsdóttir dvaldi hjá okkur frá 12. mars og undirbjó nemendur í 7.-10. bekk fyrir árshátíðina.  Sett var upp stytt útgáfa af söngleiknum Litlu Hryllingsbúðinni og er óhætt að segja að sýningin hafi slegið rækilega í gegn.  Nemendur fóru hvað eftir annað á kostum í túlkun sinni og áhorfendur skemmtu sér hið besta.  Jóhanna Friðrika sem er fyrrverandi Víkurbúi og nemandi Víkurskóla á mikinn heiður skilinn fyrir framlag sitt og það er skólanum mikils virði að eiga aðgang að jafn hæfum listamanni og henni (höf. Þorkell)

Í apríl á síðasta ári sóttum við í Víkurskóla um styrk úr sjóðnum „Forritarar framtíðarinnar“. Þann 21. desember síðastliðinn barst okkur bréf frá sjóðnum þar sem meðal annars segir svo:

„Góðan dag,

Innilega til hamingju!

Það gleður okkur að tilkynna ykkur að Víkurskóli hefur hlotið styrk úr sjóðnum Forritarar framtíðarinnar. Styrkir sjóðsins eru í formi tölvubúnaðar og fjárstyrks til þjálfunar kennara til að búa þá betur undir forritunarkennslu fyrir nemendur. Ykkar styrkur felst í þjálfun á kennurum í forritun að verðmæti allt að 100.000 kr. Auk þess sem skólinn fær afhentar 15 tölvur frá sjóðnum að andvirði 975.000 kr.

Ef það eru einhverjar spurningar þá endilega verið í sambandi …og til hamingju!

Bestu kveðjur,

Stjórn Forritara framtíðarinnar“

Sjóðurinn „Forritarar framtíðarinnar“ er samfélagsverkefni sem hefur það hlutverk að efla forritunar- og tæknimenntun í grunn- og framhaldsskólum landsins.  Frá stofnun sjóðsins árið 2014 hefur verið úthlutað til skóla landsins styrkjum fyrir hátt í 40 milljónir króna.

Sjóðnum bárust 32 umsóknir í þessari úthlutun, flestar frá grunnskólum.  Ellefu skólar hlutu styrk að þessu sinni samtals að upphæð 6,5 milljónir króna.

Við erum mjög glöð og þakklát fyrir þennan myndarlega styrk sem svo sannarlega er okkur mikil hvatning.  Þegar er byrjað að huga að möguleikum á námskeiðahaldi fyrir kennara sem og ýmsu öðru sem styrkveitingunni fylgir. (höf. Þorkell)

Diskótek yngri nemenda með tilheyrandi pylsuveislu vakti mikla lukku.  Upphaflega átti að halda fjörið fimmtudaginn 23. nóvember en vegna lokunar þjóðvegarins var því frestað til mánudagsins 27. nóvember.

Mánudaginn 4. desember fóru nemendur og kennarar í heimsókn í Víkurkirkju og á Hjallatún.  Farið var í tveimur hópum. Fyrst fóru nemendur 1.-6. bekkjar klukkan 09:50 og síðan lögðu 7.-10. bekkur af stað um 10:30. Brian fór með okkur að venju og spilaði undir söng nemenda á Hjallatúni.  Þessar heimsóknir eru orðnar hefð í skólastarfinu og eru til mikillar gleði bæði fyrir nemendur og þá sem taka á móti þeim.   Að loknum söng á Hjallatúni þáðu nemendur góðgerðir og var þeim veitingum gerð góð skil og þökkum við kærlega fyrir frábærar móttökur á báðum stöðum.

Heimsókn Magnúsar Stefánssonr, forvarnarráðgjafa sem fyrirhuguð var 21. nóvember féll niður og  frestaðist til 5.desember. Heimsóknin sem var á vegum foreldrafélagsins og styrkt af sveitarfélaginu var vel heppnuð og þörf.  Magnús fundaði með nemendum og foreldrum í 5.-10. bekk.

Nemendur hafa verið duglegir við að skreyta skólann sinn og undirbúa litlu-jólin. Það er óhætt að segja að sá undirbúningur sé í fullum gangi þessa dagana með tilheyrandi æfingum á söng og leikverkum.  Litlu-jólin verða haldin hátíðleg föstudaginn 15. desember og að þeim loknum hefst jólafríið.  Skólastarf hefst svo á nýju ári miðvikudaginn 3. janúar með starfsdegi kennara. (höf. Þorkell)