Víkurskóla var slitið með formlegum hætti 2. júní sl. Við skólaslit voru 66 nemendur skráðir í skólann. Tveir starfsmenn létu af störfum, þær Erla Þórey Ólafsdóttir kennari og Anna Birna Björnsdóttir stuðningsfulltrúi, Víkurskóli þakkar þeim fyrir góð störf og ánægjulega samfylgd.. Að þessu sinni útskrifuðust 7 nemendur úr 10. bekk, Víkurskóli óskar þeim innilega til hamingju og bjartrar framtíðar. Hér má sjá mynd af þessum glæsilega hópi.

Frá vinstri; Íris Anna Orradóttir, Sóley Karitas Sveinsdóttir, Ólöf Ósk Bjarnadóttir, Bjarni Steinn Vigfússon, Kristín Gyða Einarsdóttir, Dalrós Jóna Guðnadóttir  og Aníta Ósk Reynisdóttir. Á myndinni er líka umsjónarkennari hópsins Victoria Reynholdsdóttir.

Mánudaginn 26. maí buðu nemendur á unglingastigi foreldrum sínum að koma og sjá brot af vinnu vetrarins. Nemendur úr 9.-10.b kynntu Erasmus+ verkefnið og sögðu frá ferðalagi sínu til Póllands á dögunum og hvernig þau tóku á móti pólskum nemendum. Einnig sýndu nemendur myndbönd sem þeir höfðu unnið upp úr Gunnlaugs sögu Ormstungu og Hrafnkels sögu Freysgoða, sem og myndir og myndbönd af tilraunum sem þau unnu í eðlis- og efnafræði. Foreldrar fjölmenntu á kynninguna og áttum við góða stund saman.

Á dögunum var haldin upplestrarkeppni í Víkurskóla, en nemendur hafa í vetur unnið að því að undirbúa sig fyrir hana. Keppnin var jafnframt undankeppni fyrir Röddina, upplestrarkeppni skólanna í Rangárvallasýslu, V-Skaftafellssýslu og Vestmannaeyja.
Í fyrstu umferð lásu nemendur brot úr Sögunni af Bláa hnettinum eftir Andra Snæ Magnason og í annarri og þriðju umferð lásu nemendur ljóð sem þau völdu sjálf.
Leikar fóru þannig að þau Hafdís Hanna og Bragi Þór munu keppa fyrir hönd Víkurskóla í Röddinni sem fer fram í Vestmannaeyjum þann 13. maí n.k.
Ísey Myrra verður varamaður.

Á dögunum héldum við morgunverðaboð í skólanum okkar, þar sem nemendur fengu tækifæri til að kynna verkefni sín um Ísland fyrir foreldrum. Nemendur stóðu sig með mikilli prýði og sýndu bæði þekkingu og metnað í sínum kynningum.

Að lokinni kynningu settust allir saman við kaffiborð, þar sem foreldrar höfðu lagt til veitingar í anda pálínuboðs. Þessi samvera skapaði gott tækifæri til að njóta stundarinnar.

Viðburðurinn tókst afar vel, og var sérstaklega ánægjulegt að sjá hve vel foreldrar tóku þátt, sem endurspeglar sterkan stuðning þeirra við skólastarfið.