Árshátíð Víkurskóla

Menntaverðlaun Suðurlands 2023

Víkurskóla hlotnaðist sá heiður að taka á móti Menntaverðlaunum Suðurlands í gær, verðlaunin fengum við ásamt Kötlu jarðvangi en við höfum átt frábært samstarf við Jóhannes jarðfræðing hjá jarðvanginum og þá hefur skipt miklu máli áhugi og velvild stjórnar jarðvangsins gagnvart verkefninu.

https://www.sass.is/vikurskoli-og-katla-jardvangur-hlutu-menntaverdlaun-2023/

Lífshlaupið 2024

Lífshlaupið,hvatningarverkefni ÍSÍ er hafið og að venju á Víkurskóli tvö lið í keppninni, nemendur og starfsmenn. Það átti vel við að keppnin hófst 7. febrúar en þann dag bar einmitt upp á skíðaferð eldri nemenda og jafnframt notuðu yngri bekkir tækifærið og fóru út að renna. Víkurskóli hvetur nemendur og foreldra til að taka sameiginlega þátt í þessu frábæra hreyfiátaki. Hægt er að fylgjast með framgangi keppninnar á lifshlaupid.is

Skíðaferð í Bláfjöll

Nemendur í 7.-10. bekk fóru í skíðaferð í Bláfjöll 7. febrúar. Eins og alltaf er mikil spenna í kringum skíðaferðir skólans þar sem þetta er talsvert ferðalag og alltaf ótryggt hvernig aðstæður eru á skíðasvæðinu. Ferðin gekk mjög vel og krakkarnir nutu þess að renna sér í brekkunum. Á heimleiðinni var stoppað í pizzu í Hveragerði og allir komnir til síns heima fyrir klukkan 20:00. Góður upptaktur fyrir Lífshlaupið sem hófst einmitt þennan dag.

Nemendafélagið styrkir Björgunarsveitina Víkverja

Krakkarnir í 5.-6. bekk tóku að sér að halda flotta hlutveltu í upphafi aðventu á sama tíma og foreldrafélagið var með sitt árlega jólaþemasíðdegi. Nemendafélagið hafði áður lagt til að ágóðinn færi til að styrkja okkar góðu Björgunarsveit, Víkverja. Öll númer seldust upp og fulltrúar nemendaráðs, Olof Jóhann Ísólfur og Bragi Þór afhentu Orra Örvarssyni ágóðann 85 þúsund krónur á Litlu-jólum Víkurskóla. Nemendráð færir Margréti Harðardóttur á Hótel Dyrhólaey og Kolbrúnu Matthíasdóttur kærlega fyrir stuðninginn við þetta verkefni en þær gáfu að stórum hluta alla vinningana.

Þjóðlegir dagar, kveðskapur, dans og þorrablót

Þjóðlegir dagar í Víkurskóla voru einstaklega vel heppnaðir. Þessum þemadögum lauk í gær á árlegum þorrablóti Víkurskóla. Meðal þess sem nemendur lærðu var að gera  ferskeytlur og fór fram samkeppni um bestu vísubotnana. Valdir voru bestu, fyndnustu og frumlegust botnarnir og fengu sigurvegararnir smá verðlaun afhent. Að venju var snæddur þorramatur og gaman að sjá að krakkarnir voru óhræddari en oft áður að smakka hinar ýmsu tegundir, kannski vegna þess að nú var búið að undirbúna jarðveginn og kynna þessa fornu matarhefð meira og betur á þemadögunum.

Að afloknum þorramat komu allir saman í holinu og sungu saman þorralög undir stjórn Alexöndru tónskólastjóra og nemendaráð fluttu vandaðan annál skólaársins sem þau höfðu tekið saman. Þvínæst var tekið í spil, nemendur í 1.-4. bekk spiluðu Ólsen, Ólsen og nemendur 5.-10. bekkjar spiluðu félagsvist. Það voru þær Maja Rutkowska í 1. bekk og Íris Anna Orradóttir í 9. bekk sem urðu hlutskarpastar í hvorum flokki og fengu hamborgaraveislu í  verðlaun sem veitingastaðurinn Smiðjan gaf.

Jón Pétur danskennari var líka hjá okkur þessa viku og eins og alltaf var boðið upp á opna æfingu í síðasta tímanum. Foreldrum/forráðamönnum var að venju boðið að koma og fylgjast með og það er afar skemmtilegt hversu vel þessi viðburður er sóttur. Jón Pétur slær alltaf upp balli í lokin þar sem allir koma saman á dansgólfinu.

Heimsókn á þjóðlegum dögum

Við fengum hana Kristbjörgu Hilmarsdóttur textílhönnuð og bónda á Þykkavabæjarklaustri í heimsókn til okkar á þjóðlegum dögum skólans. Hún sýndi krökkunum glæsilegt handverk sem hún vinnur, einnig ýmis handbrögð við ullarvinnslu og síðast en ekki síst sagði hún krökkunum frá mörgu sem tengist íslensku handverki fyrr og nú. Krakkarnir voru mjög áhugasöm og þetta var mjög vel heppnað og við þökkum Kiddu kærlega fyrir að koma.

Þjóðlegir dagar

Dagana 18.-25. janúar verður skólastarf Víkurskóla með þjóðlegu ívafi, þar að auki verður Jón Pétur danskennarinn okkar með námskeið mánudag til miðvikudag.

Hér er yfirlit yfir það helsta sem verður á döfinni. Þjóðlegir dagar 2024

16 desember

Jólafrí

Heimilsfang: Mánabraut 3 |  Pósthúmer: 870 Vík | Símanúmar: 487 1242 | Netfang: vikurskoli@vikurskoli.is

Tilkynningar um leyfi eða veikindi nemenda: 487-1242 eða á netfangið vikurskoli@vikurskoli.is