Þriðjudaginn 21. apríl fóru nemendur í 7. og 8. bekk í heimsókn á Hjallatún. Nemendur spiluðu ólsen ólsen og félagsvist við heimilisfólk og svo var þeim boðið upp á vöfflur. Heimsóknin gekk glimrandi vel og auðvitað stóðu krakkarnir sig með prýði eins og alltaf.

Ár hvert er haldin upplestrarkeppnin Röddin sem er hvatningarverkefni grunnskólanna í Vestur-Skaftafellssýslu, Rangárvallasýslu og Vestmannaeyja. Okkur í Víkurskóla hlotnaðist sá heiður að halda keppnina í ár og fór hún fram á Hótel Kötlu að Höfðabrekku þriðjudaginn 14. apríl og þökkum við fyrir rausnarlegar móttökur þar.

Fyrir hönd Víkurskóla kepptu þær Harpa Sóllilja Ólafsdóttir og Michalina Danuta Rutkowska. Að auki las Gréta Björk Einarsdóttir upp kynningu á ljóðum keppninnar. Stóðu þær sig allar með mikilli prýði.

Úrslitin fóru sem svo:

1. sæti – Caritas Rós Tinnudóttir, Grunnskóli Vestmannaeyja
2. sæti – Hrafnkell Frosti Ómarsson, Grunnskólinn á Hellu
3. sæti – Embla Bríet Einarsdóttir, Hvolsskóli

Krakkarnir í 2. og 3. bekk hafa síðust vikur lært fjölmargt um landnám Ísland og Víkingaöld.  Krakkarnir hafa skyggnst inn í daglegt líf landnámsfólks, lært um stéttaskiptingu, hvernig landsvæði hentaði best til búsetu,  tómstundir, siði, fatnað og skart, mat og auðvitað um hina ýmsu landsnámsmenn- og konur. Eftir skartgripagerð, lestur, grúsk, teiknivinnu og fleira fórum við í Víkurfjöru og útbjuggum í sameiningu landnámsbæi. Mynduð voru fjöll, tún, kartöflugarðar, skálar, skip og varnargarðar og rúsínan í pylsuendanum var að finna öndvegissúlu.