Röddin, upplestrarkeppni Víkurskóla.

Þann 29. mars fór fram skólakeppni upplestrarkeppninnar Raddarinnar. Röddin tekur við af Stóru upplestrarkeppninni sem lauk göngu sinni á síðasta ári. Nú munu skólarnir í Rangarvalla- og Vestur Skaftafellssýslu auk Grunnskóla Vestmannaeyja sameinast um að halda árlega héraðskeppni undir nafninu Röddin.  Nemendur 7. bekkjar Víkurskóla hafa æft upplestur af kappi í vetur og stóðu sig afar vel í skólakeppninni. Það verða þær Íris Anna og Aníta Ósk sem munu lesa upp á héraðskeppninni sem haldin verður á Kirkjubæjarklaustri í lok apríl n.k. Við þökkum krökkunum í 7. bekk og umsjónarkennara þeirra, Þuríðar Lilju Valtýsdóttur kærlega fyrir flottan viðburð.

Vorið og páskar nálgast.

Þessar fallegu körfur unnu nemendur 1.-2. bekkjar í listatíma. Þær minna okkur á að vorið og páskarnir nálgast og svo er líka gott að hafa ekki öll eggin í sömu körfunni😊

Fulltrúi Víkurskóla á Barnaþingi.

Barnaþing var haldið í Hörpu dagana 3. og 4. mars til að ræða ýmis samfélagsmál sem tengjast mannréttindum, skóla-og menntamálum og umhverfismálum. Guðni Th. Jóhannesson, Forseti Íslands, setti þingið sem fór fram með þjóðfundarsniði.  Rúmlega 100 börn komu saman á þinginu. Guðjón Örn Guðmundsson, nemandi í 8. bekk hér í Víkurskóla sat þingið og vann í hópi umhverfismála.  Í lok þings voru niðurstöður formlega afhentar forsætisráðherra, mennta- og barnamálaráðherra og umhverfisráðherra sem jafnframt svöruðu spurningum barnanna. Niðurstöður þingsins verða svo í framhaldinu gefnar út í skýrslu og það verður áhugavert að sjá hvað börn á Íslandi hafa til málanna að leggja.

Egyptaland hið forna.

Nemendur í 3. og 4. bekk eru að vinna með sögu mannkyns. Þau hafa verið að fræðast um Egyptaland hið forna, þau vita að þar réðu konungar sem kallaðir voru faraóar, fólkið vann fyrir faraóana sem lét það hlaða pírramída þeim og guðunum til dýrðar. Krakkarnir vita líka að líkömum háttsetts fólks var breytt í múmíur og þær settar í kistur sem settar voru í grafhýsi inni í píramídunum.  Hér má sjá nemendur í skapandi starfi byggja líkön af slíkum byggingum og eins og við alla byggingarlist reynir á útsjónarsemi, samvinnu og stærðfræði.

Gjöf til söfnunar fyrir Hreystibraut við Víkurskóla.

Kvenfélag Dyrhólahrepps færði skólanum peningagjöf að upphæð 200 þúsund krónur til styrktar hreystibrautarverkefni Víkurskóla. Söfnun vegna hreystibrautarinnar stendur enn yfir og áætlað að henni ljúki fyrir vorið. Þeir sem vilja leggja söfnuninni lið er bent á að hafa samband við skólann og eins er enn hægt að styrkja verkefnið með kaupum á vönduðum sokkum frá Icewear. Á myndinni má sjá stjórn Kvenfélags Dyrhólahrepps og skólastjóra þegar gjöfin var formlega afhent. Víkurskóli þakkar félaginu rausnarlega gjöf og hlýhug til skólans.

Þorrablót Víkurskóla.

Að venju héldum við þorrablót með okkar hefðbundnu sniði. Að vísu þurftum við að færa það til þar sem covid bankaði hressilega uppá. Þorramaturinn var á sínum stað að honum loknum söfnuðust allir saman á sal skólans og nemendaráð flutti annál ársins, allir sungu þjóðleg lög af hjartans lyst og svo síðast en ekki síst var tekið í spil. Yngri nemendur spiluðu Ólsen, Ólsen og eldri nemendur spiluðu félagsvist. Í fyrsta sæti í eldri hópnum, annað áríð í röð var Björn Vignir og Maksimyllian var sigurvegari í Ólsen, Ólsen keppninni. Við óskum til hamingju. Þessi dagur var í alla staði velheppnaður.

Valentínusarball í Víkurskóla

Í dag eru krakkarnir í 7.-10. bekk í óðaönn að undirbúa Valentínusarball skólans. Til stóð að það yrði í kvöld en veðurspáinn er slæm þannig að ballið verður á morgun þriðjudaginn 15. febrúar klukkan 19:30. Skólabíllinn keyrir.

 

COVID turninn varð til.

Lífshlaupið er heilsu- og hvatningarverkefni Íþrótta- og Ólympíusambands Íslands með það að markmiði að hvetja alla landsmenn til að hreyfa sig daglega. Víkurskóli er heilsueflandi grunnskóli og tekur þátt í þessu verkefni á hverju ári. Samkvæmt Aðalnámskrá grunnskóla (2011) er Heilbrigði og velferð einn af sex grunnþáttum menntunnar. Heilsueflandi grunnskóli er ætlað að styðja skóla í að vinna markvisst að heilsueflingu í starfi sínu. Í því felst að skapa skólaumhverfi sem stuðlar að andlegri-, líkamlegri- og félagslegri heilsu og vellíðan nemenda og starfsfólks í samvinnu við heimili og nærsamfélag. Í lífshlaupinu er markmiðið að nemendur hreyfa sig í minnstalagi í 60 mínútur á dag í tvær vikur.

Krakkarnir í 3. og 4. bekk eru orðin smá þreytt á COVID eins og flestir í samfélaginu. Í útihreyfingu dagsins var skipulagið að búa til snjóhús en við komumst fljótt að því að það var aðeins of tímafrekt verkefni. Bekkurinn dó ekki ráðalaus enda lausnamiðuð með eindæmum og snjóhúsið varð að snjóturni. Í þessu samvinnuverkefni var mikið spjallað saman og kom upp sú góða hugmynd að það væri nokkuð gott ef að hægt væri að loka COVID veiruna inni í turni og geyma hana þar. Varð úr að snjóturninn varð að COVID turni og trúum við því staðfastlega að veiran geymist vel í honum.

Smá sýnishorn af útikennslu hjá 1. og 2. bekk síðustu daga en þau voru dugleg að nýta góða veðrið að undanförnu eftir allt of langa inniveru í tengslum við covid. Eins og sjá má skein gleðin úr hverju andliti og að þau voru dugleg að nýta sér það sem að vegi þeirra varð til eflingar á styrk og jafnvægi.

Víkurskóli fær góða bókagjöf.

Svavar Guðmundsson rithöfundur og einn af okkar góðu velunnurum færði Víkurskóla á dögunum veglega bókagjöf. Svavar hefur ekki látið fötlun sína stöðva sig við ritstörfin þrátt fyrir að hann sé einungis með 10% sjón. Á dögunum gerði hann samning við Menntamálastofnun um að ein af bókum hans verður í boði sem námsgagn fyrir grunnskóla. Víkurskóli þakkar Svavari fyrir hans hlýhug og góðu gjöf.

Heimilsfang: Mánabraut 3 |  Pósthúmer: 870 Vík | Símanúmar: 487 1242 | Netfang: vikurskoli@vikurskoli.is

Tilkynningar um leyfi eða veikindi nemenda: 487-1242 eða á netfangið vikurskoli@vikurskoli.is